بچے کی دعا
(ماخوذ)
لب پہ آتی ہے دُعا بن کے تمنّا میری زندگی شمع کی صورت ہو خدایا میری
مطلب: خدائے عزوجل کی بارگاہ میں بچہ دعا کرتا ہے کہ میرے لبوں پر یہ دعا آرزو بن کر مچل رہی ہے کہ میری زندگی شمع کی مانند ہو ۔
دُور دنیا کا مرے دم سے اندھیرا ہو جائے ہر جگہ میرے چمکنے سے اُجالا ہو جائے
مطلب: شمع جو گھور اندھیرے کو منور کر دیتی ہے لیکن خود جلتی رہتی ہے ۔ دنیا میں جہالت کی جو تاریکی چھائی ہے، بار الہٰ وہ میرے علم کی بدولت دور ہو جائے ۔
ہو مرے دم سے یونہی میرے وطن کی زینت جس طرح پھول سے ہوتی ہے چمن کی زینت
مطلب: جس طرح پھول چمن کی زیبائش اور زینت کا سبب ہوتا ہے اسی طرح میری ذات میرے وطن کی زیبائش کا سبب بن جائے ۔
زندگی ہو مری پروانے کی صورت یارب علم کی شمع سے ہو مجھ کو محبت یارب
مطلب: خداوندا! جس طرح پروانہ شمع پر نثار ہو کر زندہَ جاوید ہو جاتا ہے اسی طرح مجھ کو بھی صلاحیت عطا کر کہ اپنی جدوجہد اور قربانی سے وطن کو سنوار سکوں ۔
ہو مرا کام غریبوں کی حمایت کرنا دردمندوں سے، ضعیفوں سے محبت کرنا
مطلب: میری ذمہ داری یہ ہے کہ ہر شخص سے محبت کروں ، غریبوں ، کمزوروں اور ضرورت مندوں کے کام آوَں ۔
مرے اللہ! بُرائی سے بچانا مجھ کو نیک جو راہ ہو، اس رہ پہ چلانا مجھ کو
مطلب: میرے مولا مجھے ہر طرح کی برائی سے بچا کر نیکی کے راستے پر چلنے کی توفیق عطا کر ۔
